កំពង់ធំ៖ រដ្ឋបាលខេត្តកំពង់ធំ ពន្យារពេលរៀបចំពិធីអុំទូកដែលគ្រោងធ្វើនៅថ្ងៃទី០៩-១០ ខែតុលា ឆ្នាំ២០២២ ដោយសារកម្ពស់ទឹកស្ទឹងសែនហក់ឡើងខ្លាំងបណ្ដាលឱ្យលិចផ្លូវមួយចំនួនក្នុងក្រុងស្ទឹងសែន ខេត្តកំពង់ធំ ដែលមិនអាចឲ្យទូកអុំឆ្លងកាត់ស្ពានបាន។

តាមសេចក្តីជូនដំណឹងរបស់រដ្ឋបាលខេត្តកំពង់ធំ ពិធីអុំទូកនឹងអាចប្រារព្ធឡើងវិញ នៅពេលដែលអាកាសធាតុអំណោយផល។

គូសបញ្ជាក់ថា ស្ថានភាពទឹកស្ទឹងសែននាថ្ងៃទី៣ ខែតុលា បានហក់ឡើងដល់ ១៣,៩៥ម៉ែត្រ ដែលលើសពីកម្រិតប្រកាសឲ្យប្រុងប្រយ័ត្នចំនួន ០,៤៥ ម៉ែត្រ។

កាលពីថ្ងៃទី២ ខែតុលា អភិបាលខេត្តកំពង់ធំ លោក ងួន រតនៈ បានយកអំណោយផ្តល់ជូនដល់ប្រជាពលរដ្ឋក្នុងស្រុកស្ទោង ចំនួន ៣៦០គ្រួសារ ដែលមានជីវភាពខ្សត់ខ្សោយ ហើយទទួលរងគ្រោះដោយសារទឹកជំនន់។ លោកអភិបាលខេត្តបានណែនាំឲ្យអាជ្ញាធរមូលដ្ឋានត្រូវតាមដាននូវស្ថានភាពទឹកជាប្រចាំ និងចាត់វិធានការជម្លៀសពលរដ្ឋដែលរងគ្រោះដោយសារទឹកជំនន់ឲ្យបានទាន់ពេលវេលា។

សូមបញ្ជាក់ថា ខេត្តឧត្តរមានជ័យបានប្រព្រឹត្តពិធីបុណ្យអុំទូកកាលពីដើមខែតុលា។ ខេត្តមួយចំនួនទៀតនឹងរៀបចំពិធីអុំទូកផងដែរ ក្នុងនោះមានខេត្តបាត់ដំបង នឹងរៀបចំនៅថ្ងៃទី៩-១០ ខែតុលា ខេត្តកណ្តាល ធ្វើនៅក្រុងតាខ្មៅ ថ្ងៃទី២២-២៣ ខែតុលា និងខេត្តព្រះសីហនុ ធ្វើឡើងនៅខែវិច្ឆិកា នៅអាងទឹកព្រៃនប់ ស្ថិតក្នុងភូមិព្រៃនប់២ ឃុំព្រៃនប់ ស្រុកព្រៃនប់៕